(Charles Balfour)
Come Hielandman, come Lowlandman
Come every man on earth, man
And I'll tell ye how I got on
Atween Dundee and Perth, man
I gaed upon an iron road
A rail they did it ca', man
And ruggit by an iron horse
An awfy beast to draw, man (ruggit - pulled)
There were hooses in a lang straight row
A-standin' upon wheels, man
And the pair o' chiels that fed the brute
Were black as ony de'ils, man
And ne'er a thing they gave the beast
But only coals to eat, man
'Twas the queerest beast that e'er I saw
For it had wheels for feet, man
The beast it roared and aff we gaed
Through water, steam and stanes, man
We gaed at sic a fearful rate
I thought we'd brak' oor banes, man
By and by we stoppit
At a place ca'd something-Gowrie
But ne'er a word had I to say
But only sit and glower, aye
And after that we crossed the Tay
And landed into Perth, man
I vow it was the queerest place
That e'er I saw on Earth, man
For the hooses and the iron horse
Were far aboon the land, man
And how they got them up the stairs
I cannae understand, man
But noo I'm safely landed
And my feet are on the sod, man
If I gang tae Dundee again
I'll tak' another road, man
Though I should gang upon my feet
Till I'm no' fit to stand, man
Catch me again when I'm ta'en in
Wi' the terrible iron horse, man
(as sung by Tony Cuffe)